IMINSI 40 Y'UBUZIMA BUFITE INTEGO: UMUNSI WA 7, 'IMVANO YA BURI KINTU'

 IRIBURIRO 

Byose ni kubw’Imana, nitwa Kubwimana, nkunda kubwira abantu ko izina ryanjye ndikundira ko riri mu bimfasha kunyura mu bintu byose byaba byiza cyanga bibi. Iyo ngeze ku kintu runaka kinejeje nibuka ko ari kubw’Imana bityo bikamfasha kwirinda kumva ko ari imbara za Kubwimana Joel zibikoze ahubwo ko ari kubw’Imana. Iyo ndi mu bihe biruhije nabwo nibuka ko byose ari kubw’Imana bityo si ncike integer ngo numve ko birangiye. Ni gake niheba, yewe ndi umuntu ukunda kuvuga, ku buryo abo tubana bose iyo babonye maze isaha ntavuga batangira kumbaza niba hari icyo nabaye. Ntibinjya binkundira ko mara umunsi cyangwa amasaha mbabaye cyangwa ndakaye. Muri byinshi bituma numva nahorana umunezero ni uko namenye neza ko byose ari kubw’Imana. Uyu umunsiwa 7 turasoma isomo rivuga ngo “ IMVANO YA BURI KINTU.”

IMVANO YA BURI KINTU

Kuko Imana yaremye byose ikwiye kubyubahirwa, Ijambo ry’Imana ryo ritubwira ko dukwiye kubaha no guha Imana icyubahiro kuko ariyo yaremye byose. Icyubahiro cy’Imana nicyo cyatumye irema byose niyo mpamvu icyo tubereyeho ari ukuzamura icyubahiro cy’Imana mu kuramya kwacu. Rick Warren agaragaza ko hari abintu bibiri Imana yaremye bitayihesha icyubahiro: Abamalayika baguye natwe abantu. Wa kwibaza ngo nigute abantu tudahesha Imana icyubahiro kandi ariyo yaturemye? Umuntu wese ugira ibindi akunda akabirutisha Imana. Uwo aba yanze guha Imana icyubahiro ahubwo akigomeka ku Mana. Umwuka wo kwigomeka ku Mana uva mu kwishyira hejuru, dore ko ari cyo cyaha cya mbere cya kozwe na Satani. Usanga rero kwishyira hejuru kwa bantu bituma twiremera ibigirwamana bitandukanye nk’amafaranga, umugabo, umugore, abana, akazi, kwamamara, kwimika ibyamamare (abakinnyi, abanyamuzika, abanyapolitiki, abanyamadini n’abayobozi b’amatorero bigira ibirangirire, n’abandi).. Ikintu cyose uhaye agaciro kuruta Imana gihinduka ikigirwamana kuko uba ukigize imana yawe.  Itandukaniro ni uko ibigirwamana biratenguha ariko Imana yaremye byose yo ntabwo itenguha abayubaha bayiha icyubahiro ku manywa na nijoro. Ikindi abantu twese nta numwe wavuga ko aha Imana icyubahiro cyayo uko igikwiye, bityo twese abantu Imana yaremye, uhereye kuri Adamu na Eva nti twabashije kuyiha icyubahiro uko bikwiye. Imana ishimwe ko ari umutunzi w’imbabazi nyinshi, kuko yatanze Yesu ngo adupfire tukiri abanyabyaha. Niyo mpamvu kumenya Yesu nyakuri bituzana ku guha Imana icyubahiro tubaho ubuzima bunezeza Imana. Aho dusitaye tugahita dutakira Imana ngo itubabarire bityo umubano wayo natwe ukomeze ube uwo kuyiha icyubahiro, kuko umunyabyaha atabasha kunezeza Imana. Ubuzima bwa Yesu ku isi buhishura ko intego y’ubuzima ari uguhesha Imana icyubahiro, kuko mbere yo gusubira mu ijru yavuze ati “ Data na kubahishije aha mu isi.” Bivuze ko niba wizera Yesu Kristo nawe ukwiye kuba uwubahisha Imana, bivuze uhesha Imana icyubahiro. 

Reka uyu munsi dusoreze ku ibintu bitanu Rick Warren agaragaza dukwiye gukora duhesha Imana icyubahiro:

1.       Duhesha Imana icyubahiro tuyiramya: Kuramya birenze kuririmba ni ukubaho ubuzima tunezererewe Imana, tuyikunda kandi tukitanga ngo dusohoze imigambi yayo.

2.       Duhesha Imana icyubahiro dukunda benedata: Gukurikira Kristo si ukwizera gusa ahubwo harimo kugira aho ubarizwa mu muryango w’Imana (Itorero) kandi kuba mu Itorero nti bihagije ukwiye no kurangwa n’imirimo mwiza. Kuko kwizera kutagira imirimo kuba gupfuye, kandi urukundo si amagambo ahubwo urukundo nyarwo rugaragara mu bikorwa. Rick Warren we ati “ Imana ni urukundo kandi gukunda birayuhisha.” 

3.       Duhesha Imana icyubahiro duhinduka tugasa na Kristo: Iyo twizeye Imana tukinjira mu muryango w’abana b’Imana, hakurikiraho kugenda duhinduka kandi ikigero gikuru cyo guhinduka ni Kristo. Bivuze ko guhinduka ari uguharanira gusa na Kristo, gukora no kubaho nka Kristo Yesu niko guhinduka kandi bihesha Imana icyubahiro.

4.       Duhesha Imana icyubahiro iyo dufashisha bandi impano zacu: Buri wese yaremwe n’Imana mu buryo bwihariye, kandi Imana yamuhaye ubumenyi, impano zihariye. Bityo gukoresha impano twahawe n’Imana dufasha abandi bihesha Imana icyubahiro kuko tuba dusohoza icyo yaziduhereye. 

5.       Duhesha Imana icyubahiro tubwira abandi ibyayo: Imana ishaka ko urukundo rwayo n’imigambi yayo ubibwira abandi igihe umaze kubimenya. Ntabwo dukwiye kwihererana iby’Imana, kuko bitakiri ubwiru ahubwo byarahishuwe. Bityo iyo umaze kumenya ubwiru bw’Imana ukwiye kubwamamaza ngo n'abandi nabo babumenye bityo bave mubyaha.

Yesu niwe cyitegererezo cyacu, yahisemo guhesha Imana icyubahiro. Reka natwe tuvuga ko turi abakristo tugere ikirenge mu cye tubaho ubuzima buhesha Imana icyubahiro kugirango tubashe gusohoza imigambi yaturemeye. 

Ingingo yo gutekereza: Byose ni kubwayo

Umurongo wo gufata mu mutwe: “Byose bikomoka ku Mana. Byose bibeshwaho n’imbaraga zayo, kandi byose bibereyeho kuyihesha icyubahiro.” Abaroma 11:36 (LB)

Ikibazo cyo gutekerezaho: Mu mibereho yanjye isanzwe ya buri munsi, ni hehe nashobora kurushaho kubona ubwiza bw’Imana? 

Mbifurije icyumweru cyiza.