IMINSI 40 Y'UBUZIMA BUFITE INTEGO: UMUNSI WA 1, 'MBERE NA MBERE IMANA'


IRIBURIRO



 
Uyu munsi dutangiye gusoma igitabo cy'Ubuzima Bufite Intego cyanditswe na Rick Warren. Iki gitabo kimaze guhindurwa mu indimi nyinshi, kimaza gufasha benshi kwegera Imana ngo bamenye neza icyo babereyeho aha ku isi. ni byiza kugira ubuzima bufite intego, ariko akenshi usanga dushyira imbere ibyo twe twifuza,  ibitunezeza bityo ntitubeho ubuzima bunezeza Imana. Reka muri iyi minsi 40 tugiye kumara dusoma iki gitabo uhe agaciro kumenya icyo ubereyeho aha ku isi. Ushobora kuba uvuga uti, ndiho kandi ndabona nkora ibyo nshaka, yewe nageze ku intego z'ubuzima bwanjye. Ariko se ibyo urimo, ukora, uko ubayeho, ni ko Imana ishaka ko ubaho? Ese aho ntiwaba ubayeho mu buzima budafite intego kandi wibwira ko uri mu inzira nzima. Ndakwifuriza ko nyuma y'iminsi 40, uzaba umaze kumenya neza intego Imana yakuremeye bityo ubeho muri iyo ntego. 

Umunsi wa 1: MBERE NA MBERE IMANA 

Umutwe w'icyigisho dusoma uyu munsi ugira uti, "Mbere na mbere Imana." Kuko turi ibiremwa Imana yaremye niyo ifite ubuzima bwacu mu biganza bwayo. Ntidushobora kumenya intego y'ubuzima bwacu hatabayeho kwegera Imana yo yaturemye kandi ikaturemera intego runaka kugirango tuyigenderemo. Iyo habayeho kumvira isi, cyangwa amarangamutima yacu dutakaza igihe tujarajara hirya no hino, turushywa no gukora byinshi kandi bituvuna bitari mu mugambi Imana idufiteho. 
Nk'abana benshi bakuriye i Rubavu, ku mwaka mito intego yanjye yari iyo kuzaba umukinnyi w'umupira w'amaguru ukomeye cyane. Nakoresheje imbaraga zanjye zose mu mwitozo, yewe na nyuma yo kubura ijisho rimwe mu 1998, ntabwo byambujije gukomeza gukina umupira w'amaguru haba mu mashuri y'isumbuye, amarushanwa y'imirenge n'uturere.  Mubyo natekereza kuba pasiteri ntibyarimo nubwo umubyeyi wanjye yari pasiteri. Ahagana mu 2004, niho nahisemo gutangira kureka gukina umupira w'amaguru, ahubwo ntangira gushyira imbaraga mu kwiga ngo nzabe umwarimu wo muri kaminuza n'umwanditsi. Ariko nyuma yi gihe kirekire abantu kuva mu mashuri y'isumbuye banyita pasiteri ariko njye nti sindi we icyakora ndi umukristo, mu 2016, niho nemeye kuba pasiteri maze igihe kirekire rwana no kubyemera.  Nkanjye wasanga nawe ukiri kwiruka hirya no hino ukoresha imbaraga zawe ngo ugere kucyo wifuza, nibyiza kuko dusabwa gukora. Ariko se uzi neza icyo Imana ya kuremeye? nta kundi wa menya icyo ubereyeho aha ku isi hatabayeho kureka ibyo wowe wibwira, wifuza, ahubwo ugasha kumenya icyo Imana ikwifuzaho kuko ariyo yakuremye kandi ifite icyo ikuremeye.  " Ku bw'uwo natwe twarazwe umurage tubitoranirijwe kera nk'uko Imana yabigambiriye, ikora byose nk'uko ibisha mu mutima wayo." ( Abefeso 1:11) Muri Kristo Yesu niho dushobora kumenya icyo twaremewe kuko tutariho gukora ibyo dushaka ahubwo gukora ubushake bw'Imana, kandi ubwo bushake bwayo ya bugambiriye kera ibusohoreza muri Kristo Yesu. Niyo mpamvu kwakira Yesu Kristo mu buzima bwawe, no kuguma kugendana nawe ugera ikirenga mucye bizagufasha kumenya icyo Imana yakuremeye. Yesu niwe Jambo w'Imana, kandi ijambo ry'Iman twararihawe ngo rituyobore. Reka Umwuka twahawe nk'umufasha agufashe gukunda gusoma Ijambo ry'Imana kandi akwigisha, akwemeze kandi aguhanire kureka ibyaha byo bidutandukanya n'Imana.   

Ingingo yo kuzirikana: Simbereyeho gukora ibyo nishakiye. 

Umurongo wo gufata mu mutwe:  "Ni we wabiremye byose kandi ni na we byaremewe." Abakolosayi 1:16b) 

Ikibazo cyo gutekerezaho: Nubwo hari byinshi binkurura hirya no hino, nakora iki ngo mpore niyibutsa ko ubuzima nyakuri ari ukuberaho Imana aho kuberaho kwinezeza?

Umunsi mwiza wo kugira ubuzima bufite intego 

Pasiteri Kubwimana Joel 


Comments

Post a Comment

Popular posts from this blog

Rev. Mbanzabigwi Michel: Umubyeyi, Umushumba n’Umubwiriza butumwa bwiza

Image
Iriburiro Umunsi ku wundi twumva inkuru nziza ariko tukumva n’inkuru mbi. Uyu munsi kuwa 13/11/2024, mu gitondo nibwo twumvise inkuru ibabaje yu rupfu rwa Rev. Mbanzabigwi Michel, umubyeyi akaba, umushumba, umubwiriza butumwa wakoreye Imana mu gihe cye. Kuko nari nzi ko Rev. Michel amaze iminsi arwaye, ijambo rya mbere ryanjemo kandi ariryo nahise nandika aho nari mbonye iyi nkuru ibabaje ni “ Ruhukira mu mahoro.” Rev. Michel Umubyeyi wa benshi Mbanzabigwi yari umubyeyi ufite abana n’abuzukuru ku isano ya maraso. Kurundi ruhande yari umubyeyi wareze benshi mu mashuri yisumbuye, mu insengero aho yakoze hose, yewe naho yatuye hose kuko yari umuntu urangwa n’urukundo, ukunda abantu bose nta kuvangura. Urugwiro n’urukundo umubyeyi Michel yagiraga, rwatumaga buri wese amwisanzuraho. Rev. Michel yabaye inshuti ya bakuru aba inshuti ya bato, umwe mu bana yareze ubwo twaganiraga yagize ati “Pastor Michel yari umubyeyi ugira urukundo kuburyo iyo wageraga iwe mu rugo, mwasangiraga icyo a...
Read more

IMINSI 40 Y'UBUZIMA BUFITE INTEGO, UMUNSI WA 29, 'KWEMERA UMURIMO WAWE'

Image
IRIBURIRO  Umuhamagaro wo gukorera Imana nk'umupasitori ntiwigeze uba mubyo nifuzaga. Ariko kubera kuba umuyobozi w'amakorari, abanyeshuri b'abaporotesitanti mu mashuri y'isumbuye, umuyobozi w'urubyiruko mu itorero, abantu banyitaga pasiteri ntaraba we. Akenshi nahitaga nsubiza ko ntari pasiteri kandi ko ntifuza kuzaba we. Hari na banyitaga 'Mukozi w'Imana,' igisubizo kikaba guhita mbabwira ko ntari pasiteri. Babaga bavuze 'umukozi w'Imana," njye nkumva ko umukozi w'Imana ari pasiteri. Kuko umuntu asiga ikimwirukaho ariko adasika ikimyirukamo, nahunze umuhamagaro ariko wo uramfata. Uyu munsi muri gahunda yo gusoma Igitabo cy'Ubuzima Bufite Intego, turasoma icyigisho kivuga ngo " KWEMERA UMURIMO WAWE."  KWEMERA UMURIMO WAWE Ubu dutangiye intego ya kane ivuga ngo "WAREMEWE GUKORERA IMANA."  Bivuze ko mu byo njye nawe tubereyeho aha ku isi, harimo gukorera Imana. Waba wumva gukorera Imana nk'uko ...
Read more