Yakobo 1:1-4: Sitwe tugeragezwa hageragezwa kwizera kwacu

 

Iriburiro  


Big Idea: "Ibigeragezo bibereyeho gukuza Umukirisitu kugirango agere ku rugero rushyitse mu kwizera, bityo abashe kwemerwa n'Imana nyuma yo kwihanganira ibimugerageza byose."

“1Yakobo imbata y'Imana n'Umwami Yesu Kristo ndabandikiye, mwebwe abo mu miryango cumi n'ibiri y'abatatanye ndabatashya.”  Yakobo wanditse uru rwandiko ni mwene se wa Yesu. Nyuma yo kubyara Yesu Kristo binyuze ku Mwuka Wera, Maliya yabyaranye na Yosefu abandi bana. Bibiliya ivuga ko Yozefu ataryamanye na Mariya ubwo yari atwite inda ya Yesu kugeza abyaye, nyuma yo kubyara Yesu, babyaranye abana nk’uko tubisoma muri Matayo 13:55.  Pawulo avuga ku Intumwa yahuye nazo yavuze na Yakobo mwene nyina wa Yesu (Abagalatiya 15:7). Uyu Yakobo niwe wari uyoboye Itorero ry’I Yerusalemu ubwo ubutumwa bwa Kristo bwari butangiye kwamamara nyuma ya Pentekote.  Yakobo atangira urwandiko rwe agaragaza neza ko yizeraga Yesu nk’Imana kuko akoresha imvugo “ imbata y’Imana n’Umwami Yesu Kristo.” Ntabwo yamufataga nk’umuvandimwe we gusa, yari yarasobanukiwe ko ari Imana yigize umuntu, ko nyina Mariya yabaye umuyoboro wo gusohoza uko kwigira umuntu kw’Imana.

Yakobo muri uyu murongowa agaragaza neza abo yandikiye abo aribo, Abisirayeli batataniye mu mahanga. Wakwibaza uti, kuki bari baratataniye mu mahanga? Abakirisitu ba mbere bahuye n’akarengane kubera kwizera Yesu Kristo, aho guhera kuri Sitefano watewe amabuye, benshi bagiye bakubitwa, bashyirwa mu inzu z’imbohe abandi bakicwa.  Ako karengane katumye habaho ko bamwe bahunga bakajya mu bindi bihugu ni ko gutatana kwabo. Uku gutatana mu buryo bugarara kwari guteye agahinda kandi kubabaje, ariko kurundi ruhande kwari kwiza kuko aba batatanye aribo bakwije ubutumwa bwa Yesu Kristo hirya no hino mu bindi bihugu aho bari bari. Ibi bitwereka neza ko ibyo tunyuramo byose byaba byiza cyangwa bibi ko Imana ibikoresha kubw’icyubahiro cyayo. Nk’uko ijambo ry’Imana ribivuga byose bifataniriza hamwe kutuzanira ibyiza (Abaroma 8:28). Aha wa kwibaza ngo no muri Koranavirusi hari ibyiza tubonamo? Nakubwira ngo ijambo ry’Imana ni ukuri, muri byose bituzanira ibyiza ntagushindikanyena koronavirusi nayo irimo. 

1. Sitwe tugeragezwa hageragezwa kwizera kwacu

“2Bene Data, mwemere ko ari iby'ibyishimo rwose nimugubwa gitumo n'ibibagerageza bitari bimwe, 3mumenye yuko kugeragezwa ko kwizera kwanyu gutera kwihangana. 4Ariko mureke kwihangana gusohoze umurimo wako, mubone gutungana rwose mushyitse mutabuzeho na gato.” Mu buzima busanzwe cyane muri iki kinyajana cya 21, abantu benshi dushaka ubutumwa butubwira ko ibintu ari amahoro, ko dutabawe, ko tuvuye mubwiza tujya mu bundi. Ariko aha turi kubona Yakobo atangira abwira Abakirisitu ba Bisirayeli bari baratataniye mu mahanga, ko bakwiye kwemera kugeragezwa yewe ko bakwiye kwishimira kugubwaho cyangwa kugerwaho n’ibibagerageza bitandukanye. Ibaze ubu ku kubwira ko ukwiye kwishimira Koronavirusi? Umuvugabutumwa aje avuga ngo yemwe bantu Imana iravuze ngo mwishimire kugeragezwa na Koronavirusi, sinzi ko abantu benshi  bamwumva. Ariko kuko Yakobo yari azi neza ko gukurikira Yesu atari umunyenga cyangwa kugenda igitambike gusa, ahubwo harimo kwikorera umusaraba (Luka 9:23), harimo kurenganywa yewe no guhunga (Matayo 10:23), muri make harimo ibikomeye ariko abizera bakwiye kwishimira kuko “ kugeragezwa ko kwizera kwanyu gutera kwihangana.” Muyandi magambo Yakobo ari kubabwira ko ataribo bari kugeragezwa ahubwo ko kwizera kwabo ariko kuri kugeragezwa. Ibigeragezo ni rusange mu bantu, aho kugeragezwa kw’abizera gutandukaniye n’abatizera ni ku  KWIZERA.   Ku bizera Yesu Kristo hageragezwa kwizera kwabo kugirango ukwihangana kwabo ku gere ku kigero gishyitse.  Bivuze ko kugeragezwa kw'abizera Yesu ari amahirwe yo kugezwa ku kigero cyo gukura gishyitse mu kwizera kwabo.   

2. Dusabwa kwihangana mu bigeragezo kuko  

Kwihangana byongeye ho mu bigeragezo bishobora bake, kuko bisaba kuba umuntu afite kwizera Yesu Kristo. Benshi iyo tugeze mu bigeragezo usanga dushaka kwicira inzira, kwirwanirira. Aho niho hava gutsindwa kuko kwizera ni ukwemera intege nke zacu bityo tukiyegurira Kristo twivuye inyuma, twizeyeko muri byose byaba byiza cyangwa bibi, ibikomeye cyangwa ibyoroheje ko Kristo ariwe udushoboza kandi ko imigambi ye ari myiza kuri twe. Ni ukuba nka Yobu tukagera kurwego rwo kuvuga ko naho twapfa twapfa twiringiye Imana. Bene uku kwizera niko gutera kwihangana kandi kwihangana nako kugatera kunesha. Bityo reka tuzirikane ko tudasabwa guhunga ibitugerageza kuko n'abakirisitu babatatanye bahunga akarengane Yakobo yabandikiye azi neza ko aho bahungiye naho hari ibindi bigeragezo bari bari kunyuramo. Niko kubagira inama yo kwishimira ibyo bigeragezo kandi ko bakwiye kureka kwihangana kugasohoza umurimo wako muri bo. Bivuzeko kwihangana mu byo tunyuramo bigoye bisohoza umurimo ukomeye ariwo wo kwemerwa n'Imana. Kutihanganira ibikugerageza bituma utemerwa n'Imana, mu gihe kwihanganira ibikugerageza bituma Imana   yemera ko ushyitse, ukuze mu kwizera, ko ugeze ku kigero cyo kugororerwa. 

3. Ibigeragezo ni umunzani ugaragaza abizera bashyitse n'abadashyitse

Ubyaye umwana ntakure akagwingira bya kubabaza, niko bimera no ku bizera Yesu Kristo. Iyo umuntu avutse bwa kabiri, iyo yakiriye Yesu mu buzima bwe, aba abaye icyaremwe gishya (2 Abakorinto 5:17 ) umwana mu gakiza, bityo aba akwiye gukura kugirango avemo umugabo cyangwa umugore ushyitse. Niyo mpamvu Yakobo ari kwerekana ko ibigeragezo ari bimwe mu bikuza umukirisitu, ni ibyokurya akwiye kurya yishimye kuko bimugeza ku kigero gishyitse. Bityo twavuga ko Kwizera kwacu kuri kugeragezwa muri iki gihe cya Koronavirusi. Ese uri kubona ushyitse? Cyangwa ni “ Tekeli, bisobanurwa ngo: wapimwe mu bipimo, ugaraga ko udashyitse.” (Daniyeli 5:27). Umuntu w’Imana akwiye kuba atunganye rwose atabuzeho na gato, muri make ashyitse. Iyo udashyitse ibigeragezo birabigaragaza kuko uva mubyo kwizera. Ariko iyo ufite kwizera guhamye, kubakiye kuri Kristo, kutubakiye ku marangamutima no kwifuza kwa kamere muntu, ibigeragezo ntibigukura umutima ahubwo biragukomeza, biragukuza ukagera ku rugero rushyitse. Nibyo Yakobo yarimo yibutsa abatatanye kubera akarengane ko naho bari bazahura n’akarengane bityo ko bakwiye gukomera bakishima aho gukuka imitima ngo bacike intege nk’abatagira kwizera.  

Zirikana ko "Ibigeragezo bibereyeho gukuza Umukirisitu kugirango agere ku rugero rushyitse mu kwizera, bityo abashe kwemerwa n'Imana nyuma yo kwihanganira ibimugerageza byose." Sitwe tugeragezwa hageragezwa kwizera kacu, bityo dusabwa kwihanganira ibitugerageza byose, kuko ibigeragezo ari  ibyokurya by'abizera bikaba n'umunzani ugaragaza abizera bakuze mu gakiza n'abakiri abana mu gakiza. Ku iherezo hari ingororano, ikamba Imana izaha abihanganiye ibibagerageza byose. Reka no muri iki gihe cya COVID-19, twirinde twe gucika intege ahubwo dukomeze kwihanganira ibigeragezo byose bishamikiye kuri iki cyorezo, kuko hariho kwemerwa nyuma yo kugeragezwa. 

Icyumweru cyiza 

Pasiteri Kubwimana Joel




Comments

Post a Comment

Popular posts from this blog

IMINSI 40 Y'UBUZIMA BUFITE INTEGO: UMUNSI WA 1, 'MBERE NA MBERE IMANA'

Image
IRIBURIRO   Uyu munsi dutangiye gusoma igitabo cy'Ubuzima Bufite Intego cyanditswe na Rick Warren. Iki gitabo kimaze guhindurwa mu indimi nyinshi, kimaza gufasha benshi kwegera Imana ngo bamenye neza icyo babereyeho aha ku isi. ni byiza kugira ubuzima bufite intego, ariko akenshi usanga dushyira imbere ibyo twe twifuza,  ibitunezeza bityo ntitubeho ubuzima bunezeza Imana. Reka muri iyi minsi 40 tugiye kumara dusoma iki gitabo uhe agaciro kumenya icyo ubereyeho aha ku isi. Ushobora kuba uvuga uti, ndiho kandi ndabona nkora ibyo nshaka, yewe nageze ku intego z'ubuzima bwanjye. Ariko se ibyo urimo, ukora, uko ubayeho, ni ko Imana ishaka ko ubaho? Ese aho ntiwaba ubayeho mu buzima budafite intego kandi wibwira ko uri mu inzira nzima. Ndakwifuriza ko nyuma y'iminsi 40, uzaba umaze kumenya neza intego Imana yakuremeye bityo ubeho muri iyo ntego.  Umunsi wa 1: MBERE NA MBERE IMANA  Umutwe w'icyigisho dusoma uyu munsi ugira uti, "Mbere na mbere Imana."...
Read more

Rev. Mbanzabigwi Michel: Umubyeyi, Umushumba n’Umubwiriza butumwa bwiza

Image
Iriburiro Umunsi ku wundi twumva inkuru nziza ariko tukumva n’inkuru mbi. Uyu munsi kuwa 13/11/2024, mu gitondo nibwo twumvise inkuru ibabaje yu rupfu rwa Rev. Mbanzabigwi Michel, umubyeyi akaba, umushumba, umubwiriza butumwa wakoreye Imana mu gihe cye. Kuko nari nzi ko Rev. Michel amaze iminsi arwaye, ijambo rya mbere ryanjemo kandi ariryo nahise nandika aho nari mbonye iyi nkuru ibabaje ni “ Ruhukira mu mahoro.” Rev. Michel Umubyeyi wa benshi Mbanzabigwi yari umubyeyi ufite abana n’abuzukuru ku isano ya maraso. Kurundi ruhande yari umubyeyi wareze benshi mu mashuri yisumbuye, mu insengero aho yakoze hose, yewe naho yatuye hose kuko yari umuntu urangwa n’urukundo, ukunda abantu bose nta kuvangura. Urugwiro n’urukundo umubyeyi Michel yagiraga, rwatumaga buri wese amwisanzuraho. Rev. Michel yabaye inshuti ya bakuru aba inshuti ya bato, umwe mu bana yareze ubwo twaganiraga yagize ati “Pastor Michel yari umubyeyi ugira urukundo kuburyo iyo wageraga iwe mu rugo, mwasangiraga icyo a...
Read more

Isabato n'Icyumweru mu mboni ya Bibiriya.

Image
Iriburiro Isabato n’icyumweru ni iminsi ikomeye mu buzima bw’abayoboke b’amadini nk’Abayahudi, Abadivantisiti b’umunsi wa Karindwi… Kiliziya Gatolika, Abaporotesitanti n’abandi. Usanga hari impaka hirya no hino mu bayoboke b’amadini n’amatorero ku munsi nyawo wahariwe gusenga cyangwa se umunsi twafata ko wera. Usanga amahame no kwemera kw’amadini n’amatorero ari isoko y’impaka twavuze. Ariko se Bibiliya yo ibivugaho iki? Hari icyo Bibiliya ivuga ku Isabato? Ku Cyumweru? Ese Isabato ni umunsi wera kuruta indi? Ese icyumweru cyo ni umunsi wera kuruta indi? Mu kwandika iki gitabo twakoze uko dushoboye twifashisha Bibiliya cyane kugira ngo twirinde kugira indi myumvire itari iya Bibiliya dushyira imbere. Bityo turagerageza kureba icyo Bibiliya ivuga ku munsi w’Isabato. Ese Isabato n’iki? Tuze no kureba ku munsi wo ku cyumweru niba hari icyo Bibiliya ivuga kuri uyu munsi. Turasoza dutanga umwanzuro usubiza ikibazo kigira kiti ”Ese abasenga ku cyumweru baba bishe itegeko ry’Imana?” I.1. ...
Read more