IMINSI 40 Y'UBUZIMA BUFITE INTEGO, UMUNSI WA 12 'GUSHIMANGIRA UBUSHUTI BWAWE N'IMANA'

IRIBURIRO 




Hari umukecuru umwe w'i Huye dukunze kwita Bibi, mu myaka namaze i Butare isengesho rye ryabaga ari icyigisho gikomeye kuri njye. Iyo asange wumva avugana n'Imana nk'inshuti ye, nkaho Imana iri aho kandi ari kuyireba. Aba abwira Imana mu buryo wumva ari kuvugana nayo ayireba. Iteka atangira isengesho rye avuga uko Imana yabanye nawe kuva afite imyka 12. Urebye ashobora kuba ubu ageze nko mu myaka 90, ariko navuga ngo kuva ku myaka 12 azi neza ko buri ntabwe yateye ko yashobojwe n'Imana.  Uyu munsi muri gahunda yo gusoma igitabo cy'Ubuzima Bufite Intego turasoma umutwe uvuga, " GUSHIMANGIRA UBUSHUTI BWAWE N'IMANA." 

 GUSHIMANGIRA UBUSHUTI BWAWE N'IMANA 

Ejo hashize twabonye ko Imana ishaka kuba Inkoramutima yacu, bivuze inshuti yacu iduhora hafi. Bityo bidusaba ko natwe dushimangira, twiyemeza kuba inshuti z'Imana ubuzima bwacu bwose. Nka  mukecuru 'Bibi' dutangiye tuvuga, inshuti z'Imana iyo ziganira nayo, iyo zivuga Imana urabyumva, urabibona. Kuko inshuti ziganira nta rwikekwe, nta mabanga yewe nta buryarya.  Bibiliya irimo ingero nyinshi z'abantu bashimangiye ubushuti bwabo n'Imana: Aburahamu, Mose, Dawidi n'abandi. Aba bose usanga icyatumye bakomeza kuba inshuti z'Imana ari UKUMVIRA IMANA. Ni gihe abantu nka Dawidi babaga bateshutse bagakora ibyaha bihutiraga kwemera icyaha, kwihana no kongera kugaruka mu murongo wo kumvira Imana.  Kwishyira hejuru, kwihagararaho, kwikunda ni bimwe mu bituma tunanirwa kumvira Imana n'abantu bayo. Uyu mwuka wo kutumvira uva kuri satani kandi niwo wazanye icyaha mu isi, ubwo Adamu na Eva bananirwaga kumvira Imana ahubwo bakumva ibyo satani ababwiye. Iyo hari ukumvira Imana habaho no kuyifata nk'inshuti wa bwira byose yewe na gahinda kawe ko mu mutima. Dawidi ni urugero rwiza rw'inshuti y'Imana itaratinyaga kubwira Imana uko yumva ibintu. Iyo yabaga yababaye cyangwa yishimye Dawidi yagaragazaga ibiri mu mutima we nta buryarya. Nicyo dusabwa natwe, kutagira uburyarya mu mubano wacu n'Imana. Rick Warren atanga ingingo zikurikira nk'izadufasha gushimangira ubushuti bwacu n'Imana: 
- Ngomba kutagira icyo mpisha Imana 
- Ngomba guhitamo kumvira Imana 
- Ngomba guha agaciro ibyo Imana iha agaciro 
- Ngomba kwifuza ubucuti n'Imana kuruta ibindi 

Kuvuga ko turi inshuti z'Imana nti bihagije, ahubwo dukwiye kwita kuri ibi bintu bine tuvuze, kugirango tubashe gushimangira ubucuti bwacu n'Imana. Bisaba ko ubuzima bwacu bwose buhinduka ubwo kugendana n'Imana nk'inshuti tutagira icyo duhisha, ahubwo tuyishyira imbere ya bose na byose.  Imana idushoboze kuguma kunyurwa n'ubushuti bwayo kugeza igihe izaduhamagarira kubana nayo ubudatandukana mu ijuru. 

Ingingo yo kuzirikana: Urugero rwo kwegera Imana kwanjye ni jye uruhitamo. 

Umurongo wo gufata mu mutwe: " Mwegere Imana, na yo izabegera." (Yakobo: 4:8a) 

Ikibazo cyo gutekerezaho: Ni ibihe byemezo bifatika ngiye gufata uyu munsi kugira ngo ndusheho kwegerana n'Imana?  

Mugire umunsi mwiza 

Pasiteri Kubwimana Joel 

Comments

Post a Comment

Popular posts from this blog

IMINSI 40 Y'UBUZIMA BUFITE INTEGO: UMUNSI WA 1, 'MBERE NA MBERE IMANA'

Image
IRIBURIRO   Uyu munsi dutangiye gusoma igitabo cy'Ubuzima Bufite Intego cyanditswe na Rick Warren. Iki gitabo kimaze guhindurwa mu indimi nyinshi, kimaza gufasha benshi kwegera Imana ngo bamenye neza icyo babereyeho aha ku isi. ni byiza kugira ubuzima bufite intego, ariko akenshi usanga dushyira imbere ibyo twe twifuza,  ibitunezeza bityo ntitubeho ubuzima bunezeza Imana. Reka muri iyi minsi 40 tugiye kumara dusoma iki gitabo uhe agaciro kumenya icyo ubereyeho aha ku isi. Ushobora kuba uvuga uti, ndiho kandi ndabona nkora ibyo nshaka, yewe nageze ku intego z'ubuzima bwanjye. Ariko se ibyo urimo, ukora, uko ubayeho, ni ko Imana ishaka ko ubaho? Ese aho ntiwaba ubayeho mu buzima budafite intego kandi wibwira ko uri mu inzira nzima. Ndakwifuriza ko nyuma y'iminsi 40, uzaba umaze kumenya neza intego Imana yakuremeye bityo ubeho muri iyo ntego.  Umunsi wa 1: MBERE NA MBERE IMANA  Umutwe w'icyigisho dusoma uyu munsi ugira uti, "Mbere na mbere Imana."...
Read more

MUNGANYINkA MARIE GORETTE: UMUGORE, UMUBYEYI, UMUKRISTO, UMUKOZI URANGIJE URUGENDO RWE KU ISI

Image
Urupfu ni umuryango unyurwamo n’uwo rutwaye abasigaye inyuma y’uwo muryango dutegereje igihe cyacu tugasigara mu marira, agahinda bivanze n’ibyiringiro ku bizera Imana. Ku mugoraba wo kuwa 19/06/2025, nibwo numvise inkuru ya kababaro ko Munganyinka, madame Pastor Kayabo Charles inshuti yanjye yitabye Imana azize impanuka. Ubwo madamu wanjye yanyerekaga amafoto abantu batangiye gushyira kuri sitati zabo za WhatsApp, nihutiye kwandikira Pastor Charles ariko mbona nawe yashyizeho ubutumwa buvuga ngo “Ruhukira mu mahoro mugore mwiza umutima wanjye ntacyo ugushinja….,” nibwo nabonye ko ayo makuru ari impamo.    Munganyinka Umugore akaba n’Umubyeyi Namenye nyakwigendera muri za 2007 ubwo nigaga muri Kaminuza Nkuru y’U Rwanda I Butare. Umugabo we Kayabo Charles niwe twamenyanye mbere, tuba inshuti, umudamu nawe tuba inshuti kubere umugabo we ariko nyuma kubera gukunda ijambo ry’Imana. Mu bakristo nayoboye bakunze kumbaza ibibazo byinshi kuri Bibiliya Marie Gorette arimo. Ubwo n...
Read more

Rev. Mbanzabigwi Michel: Umubyeyi, Umushumba n’Umubwiriza butumwa bwiza

Image
Iriburiro Umunsi ku wundi twumva inkuru nziza ariko tukumva n’inkuru mbi. Uyu munsi kuwa 13/11/2024, mu gitondo nibwo twumvise inkuru ibabaje yu rupfu rwa Rev. Mbanzabigwi Michel, umubyeyi akaba, umushumba, umubwiriza butumwa wakoreye Imana mu gihe cye. Kuko nari nzi ko Rev. Michel amaze iminsi arwaye, ijambo rya mbere ryanjemo kandi ariryo nahise nandika aho nari mbonye iyi nkuru ibabaje ni “ Ruhukira mu mahoro.” Rev. Michel Umubyeyi wa benshi Mbanzabigwi yari umubyeyi ufite abana n’abuzukuru ku isano ya maraso. Kurundi ruhande yari umubyeyi wareze benshi mu mashuri yisumbuye, mu insengero aho yakoze hose, yewe naho yatuye hose kuko yari umuntu urangwa n’urukundo, ukunda abantu bose nta kuvangura. Urugwiro n’urukundo umubyeyi Michel yagiraga, rwatumaga buri wese amwisanzuraho. Rev. Michel yabaye inshuti ya bakuru aba inshuti ya bato, umwe mu bana yareze ubwo twaganiraga yagize ati “Pastor Michel yari umubyeyi ugira urukundo kuburyo iyo wageraga iwe mu rugo, mwasangiraga icyo a...
Read more